A crónica rap de Dios Ke Te Crew volve ao escenario: novo EP e concerto en Santiago

Sobre un riff de sintetizador e unha base crebada, electrónica, avisan: “Só quedan os mellores / na nosa escena core / Non podes parar / este xogo é ata a morte / baila ou morre, vamos, bule”. É a Danza Maldita dunha das agrupacións decanas do rap galego e en galego, os Dios Ke Te Crew. Tres anos despois do seu último disco longo, O Ciclo da Serpe, cuxas presentacións acabou abortando o coronavirus, volven ao escenario este venres, 27 de maio, na Sala Capitol de Santiago de Compostela. E fano ademais con novo material, un EP de título confesional, En que ano estamos?

Cinco cancións e unha intro, En que ano estamos? É tamén o rexistro dunha evolución. A que levou a Dios Ke Te Crew do rap combativo do seu debut Xénese (2006), peza fundamental da música galega de inicio de século, á revisión funk e, agora, ao eclecticismo ben asimilado da súa produción última. No EP hai ragga, hai vella escola, hai hardcore, hai mesmo aires latinos urbanos, e trazos de crónica da época: redes sociais, prensa, a crise climática ou unha irónica lectura sobre os tópicos da galeguidade e a ollada exterior en Orixinal Galego, featuring os xefes do trap Boyanka Kostova. “Son máis galego que o feísmo / atrévome a dicir que ata máis que o caciquismo”, comeza un tema que servira como adianto xa no último verán.

En que ano estamos? non ten, polo momento, formato físico. Si dous videoclips, o de Orixinal Galego e o de Haters, ambos os dous dirixidos por Xaime Miranda. E outro featuring, ademais dos Boyanka Kostova, o da viguesa High Paw en A molar, que introduce soul e raggamuffin no discurso da Crew. Todos subirán ao palco da Capitol este venres, nun concerto incluído na programación das festas patronais de Compostela, as da Ascensión.

Sobre un riff de sintetizador e unha base crebada, electrónica, avisan: “Só quedan os mellores / na nosa escena core / Non podes parar / este xogo é ata a morte / baila ou morre, vamos, bule”. É a Danza Maldita dunha das agrupacións decanas do rap galego e en galego, os Dios Ke Te Crew. Tres anos despois do seu último disco longo, O Ciclo da Serpe, cuxas presentacións acabou abortando o coronavirus, volven ao escenario este venres, 27 de maio, na Sala Capitol de Santiago de Compostela. E fano ademais con novo material, un EP de título confesional, En que ano estamos?